تعالوا نعمل حرب عالمية ونخلص !

بصراحة كرهت السياسة واللي سيسوها وما حدا يسألني شو معنى اللي سيسوهاحاسس صار عندي اشباع سياسي وحربي وكرهت تلفزيون الجزيرة وتلفزيون الصومال انا بقول نبدأ حرب أهلية ونخلص من هالشغلة وخلينا نخلص هالبشرية من هالهم إلي اسمه خميس..كل الدول تحالفات هاد متحالف مع هداك وهاد مش عاجبه سياسة هداك وكل واحد بده يكسرعين التاني وانت يا مواطن واقف بالنص يا اما بعيد عن حالات التفجير الصاروخي حالاتي لكن ما برضيك اللي بصير ببلدك يا اما عايش ليل نهار على وقع اصوات الصواريخ.لا هيك مرتاح ولا هيك مرتاح وايران بدها نفوذها في المنطقة واميركا بدها ترجع هيبتها المهدورة في العراق والإمارات بدها تستعيد جزرها المحتلة من ايران وعباس وفياض والشلة تاعتهم بدهم المصاري تاعت الإعمار ومصر بتكره حماس ع المسبحة وليفني بدها تفوز بالإنتخابات مفكرة حالها جولدامائير ونتنياهو نفسه ومنى عينه يرجع للوزارة من أوسع أبوابها وكوريا الشمالية بدها تحتل كوريا الجنوبية وتوحد الكوريتين وترجع شيوعية كوريا بشطريها حلوة هاي بشطريها بنص الحكي والسعودية انكشفت سياستها المتواطئة مع كل ما هو ضد التحرر من الإمبريالية العالمية ولو انه كل واحد فيهم بطلع ع التلفزيون بلقيلك خطاب بتفكر انه صلاح الدين رقم 2 ومبادرة السلام العربية حسسوني أول مرة سمعت عنها انها يا امااسرائيل بتقبل بالسلام مع العرب يا اما الحرب وبخبرتي السياسية حكيت عمرها اسرائيل ما بتوافق ع السلام معناته حتقوم الحرب.. قامت اسرائيل ما وافقت عليها قاموا رجعوا طالبوا فيها كمان مرة..قطر بتهموها انها إلها أجندتها وتركيا بدها اهداف تانية وأرمينيا بتتهم تركيا بالمذابح وروسيا نفسها ترجع امجادها المنهدرة بسبب فساد قادتها ايام الإتحاد السوفييتي واليمن بدها اعادة ترسيم حدود مع السعودية والكويت بدها ترجع اقتصادها التعبان بعد حرب التحرير وبالعراق في انتخابات وهاد بده انتخابات بدون مذاهب وهاد بده حزب ديني للشيعة والأكراد بدهم دولة لحالهم وحزب العمال الكردستاني بقاتل تركيا والبحرين محتلة جزيرتين من قطر وعمان محتلة جزء من الأراضي الإماراتية من أيام حرب الخليج الأولى وسوريا بطالب بالجولان مع انها لم تطلق رصاصة واحدة وبالسودان إلي 800 سنة بسمع انه في عندهم شهداء قلت طيب خليني اشوف شو القصة الا هو في مدينة اسمها دارفور وبدها تنفصل وبطل الواحد يعرف مين الصالح ومين الطالح واليمن الشباب هناك بخزنوا قات وبطلعوا مظاهرات ومش مقصرين الصراحة وليبيا بدها فتح الحدود مع غزة لدخول الجيوش للجهاد أي بديش أحلف انه لو كانت ليبيا ع حدود غزة كان موقفها نفس موقف مصر..واليابان بعد ضربة هيروشيما استسلمت لأميركا الواحد حكى بكرا بصحوا وبضربوا اميركا ضربة مرتبة هدول استسلموا وضلوا مستسلمين والصين لا بتهش ولا بتنش كل الجيش الصيني محطوط عشان فلان خلف كمان ولد وهو عنده واحد من أول معناته خالف القانون .أنا بقول المفروض تطلع الأمة العربية مظاهرات تطالب الحكام بحرب عالمية مرتبة نقتل بعض انت تطخني وانا اطخك ونخلص من هالشغلة ونرتاح..حبيت احكيلكم وجهة نظري عسى أن أرى قيادي بارز يوخد بوجهة نظري ونرتاح وأرجوأن لا أجد بين الزوار صائب عريقات ويحكيلي الحياة مفاوضات عشان بطخه بالمطرح..قال مفاوضات قال!!